كيف يصبح منتدانا هو الأفضل !!

السلام عليكم ورحمة الله وبركاته..
صباح الخير على الكل ..

هذا الموضوع بصراحه بصراحه هام جدا واتمنى من كل قلبي ان يكون له تقبُل عندكم ونحاول بقد مابقدر نطبق اللي فيه عشان يكون المنتدى اكثر من رائع واي ملاحظه او اي مشاركه وزياده لتطوير المنتدى الله يحيها ويحيي راعيها يجي ويكتبها هنا .. اوكي ..

يعني نسمي بالرحمن ..

بسم الله الرحمن الرحيم .. نفس عميق .. اوووووه يالله ..

* ماهو المنتدى* ..؟؟!!

المنتدى هو بيتك الثاني وفيه اصدقائك واخوانك يشاركون معك في المعرفة وفي المزح ويزعلون لزعلك ويفرحون لفرحك بس ماينامون مع بعض

وفي هالوقت كثرت المنتديات وصار هناك سباق للمنتديات وكل عضو يتمنى أن منتداه هو الأفضل صح والا مو صح ..

فكيف نجعل منتدانا هو الأفضل ؟؟

* اولاً : (( تشجيع الأعضاء الجدد ))

هذي هي البداية وانتي او انت أكيد تتذكر أول يوم جيت فيه للمنتدى وكتبت موضوع وكم تمنيت يرد عليه الكل ،، وبتشجيعنا للأعضاء الجدد يساعدهم على الأبداع فمنهم سيخرج لنا كتاب رائعين في الأدب والشعر وكتاب متميزين في الصرقعه أو في أي مجالات آخرى
والعضو الي دايم يكون الأول في الترحيب ،، حبيب وقلبه طيب. وعسل وامور كمان

والله اني ادري اني انا اول واحد مقصر في هالناحيه وماارحب بكل الاعضاء لكن ان شاء الله من اليوم ورايح او مااشارك في المنتدى تكون مشاركتي في منتدى الترحيب .. تم . . تم ..

* ثانياً : (( قبل أن نكتب أي موضوع في أي قسم معين ياريت لو نرد على موضوع او موضوعين اوثلاثه او اربعه او الخ .. ))

وهذا شئ مهم جداً ،، لأن هذا تواصل بين الأعضاء وتشجيع لهم وأي عضو يفرح بكل رد على موضوعه ويحثه على الأبداع أكثر فاكثر وأنت أذا رديت على مواضيعهم الكل بيرد على موضوعك إذا كان يستحق . والعضو الي دايم يرد على المواضيع يسمى ،، محبوب الكل احم احم زي مثلا .. كخخخ

* ثالثاً : (( تشجيع المواضيع التي يكتبها اصحابها ))

يعني نحاول قد مانقدر ان الواحد يكتب موضوع بجهدك يعني من راسه أفضل مليون مره من نقله أو نسخه من منتدى ثاني .. صح .. خلونا نكون واقعين ياجماعه الربع .. لو تجي انت وتكتب فكره أو معلومه أو ننقل من كتاب او مجلة مايستحق النشر والعضو اللي دايم يكتب مواضيعه بنفسه ،، هذا أموت فيه انا وبصراحه تكون مواضيعه مميزه ..

* رابعاً : (( الكلمة السحرية ))

وهي أن تكتب كلمة ( شكرا على هذا الموضوع ) كلمات قليله مراح تتعبك او تنقص من قدرك او كبريائك المزيف ،، كثير مانشوف مواضيع عدد قرائها فوق السبعين او الثمانين ومن هؤلاء فقد يرد على صاحب الموضوع واحد او اثنين او اكثر الأحيان تجد الموضوع خالي من أي رد ..!!
يعني أنت تبي الكل يرد على موضوعك وأنت ماتكلف على عمرك وتجامل صاحب الموضوع .. اجل وشوله تشارك وتتعب عمرك؟؟؟ على العموم المشاركه مع بعض جدا حلوه .. حلو الكلام الين الحين والا لا .. ويسمى العضو الي دايم يشارك ويحث الاعضاء على المشاركه ،، ياحبنيلك

* خامساً : (( محاربة الشليلة )) <<<< ثبتوا الاسم بس

وهذا أكبر خطر يهدد أي منتدى وكثير من المنتديات هرب منها اعضائه لهذا السبب ،، وشليلة هي أن يتفق الأعضاء ويقولون ( احنا والله شله ارتحنا لبعض ومانبي واحد جديد يخش بينا ،، والاتفاق هو ترد على موضوعي ارد على موضوعك ) ويروح فيها الضعيف ( العضو الجديد ) مايعطونه وجه لين يمل وينسحب من المنتدى ،، لا ومن زين الطبايع بعدها بفتره يقلبون على بعض ويصير كل واحد يكتب موضوع ولا يرد على الثاني ،، وخلاص انتهى المنتدى وصار ممل والاصرف انه يتقفل.

* سادساً : (( التواصل بين الأعضاء ))

التواصل بين الأعضاء في الأفراح نهنيهم وفي الأحزان نواسيهم ( عاد تخيل نفسك مريض او مسافر حتى أهلك مادروا عنك ،، وتجي للمنتدى والكل مشتاقين لك ويسألون عنك ،، أكيد بتشقق من الفرحه ومحد قدك ) كخخخخ يازينها لاني حسيت فيها باول منتدى شاركت فيه بحياتي .. من جد ياشباب ..
يسمى العضو الي دايم يسأل عن الاعضاء ،، ياطيب القلب وينك

* سابعاً : (( التقليل من المواضيع المنقولة )):

بعض الموضيع مهمه ويجب أن تنقل وتنتشر في كل المنتديات ،، لكن مسألة انك تشوف اي موضوع يعجبك وتنقله على طول هذا تو متش بصراحه يعني يمكن الواحد يكتب عشر مواضيع في اليوم يعني عن نفسي انا لو كل موضوع يعجبني انقله كان صرت ( تخصص قص ولصق ) هذي شئ يطفش بصراحه ويجيب المغص في الرئه ( وشهوله اشترك في منتدى !! .. اجل اقراء صحيفه او مجله او اتابع الاخبار في التلفزيون اصرف ) وش عنده المتابع ..
ويسمى هذ العضو ،،، مخربها..

* ثامناً : (( لاتصير خفيف وثقيل )):

يعني يجيك عضو يكتب كل يوم عشر مواضيع وفي كل قسم يمحط له ست مواضيع طبعا هو من حبه للمنتدى او من حماسه بس وربي يرغبلنا زي كذا ،، ويالله يالله نرد على نص مواضيعه ولا نلحق
ويسمى هذا العضو .. على هونك تكفى ..

* تاسعاً : (( التقليل من المشاكل وحوادث السيارات )):

يعني ثنين مقاريد تهاوشوا وقلبوا المنتدى فوق حدر ونقسم المنتدى الى حزبين وكل واحد معه عجرا وجيب الفزعه ( ياخي بينك وبين اي عضو مشكله او رده ماعجبك او لك ملاحظة ،، ارسله على الخاص وتفاهم أنت وياه بدون مايدرون الأعضاء ) واقصد في هذه النقطه نفسي كخخ فانتبهو مني
ويسمى هذا العضو المشكلجي ..

* عاشراً : (( خلك ذرب )):

يعني يجيك عضو يتعب ويكتب موضوع جاد ومهم ويتوقع ان يرد عليه ويناقشة الكل ثمن يجيك ذاك العضوا اللي مايدري وين الله حذفه ويرد رد مدري من وين حايبه ،، الموضوع في شمال وهو يرد بالجنوب ،، ويخرب الموضوع او يقلبه حلبه مصارعه .. من جد ترى هالسالفه وتصير ..
( المواضيع الجاده والمهمه تحتاج الى رد جاد وبعكسها المواضيع الساخره او المصرقعه يرد عليها برد رايح في عين امها والا مو ياعيال )
ويسمى العضو الي يرد برد في جهه والموضوع في جهه حاول تركز..

* وأخيراً * وليس أخراا..

المنتدى ليس بعدد اعضائه ،، بل بترابط اعضائه كالأسرة الواحده وكما قال رسول الله علية افضل الصلاة والسلام: (( مثل المؤمنين في توادهم وتعاطفهم مثل الجسد إذا اشتكى منه عضوا تداعى له سائر الجسد بالسهر والحمى )) وصدقوني مافي احلى من قوه العلاقه والمحبه لمن تجي عن طريق ود واحترام
وان شاء الله نستفيد من هذا الموضوع وان شاء الله اكون انا اول المستفيدين ..

اما الحين والله يدي تبعت وراسي صدع وابي انااام وابي افطر وابي وابي وامي واخي واين انت ياوطني >>>>>>>>>> الولد قام يخرف

على العموم الف شكر للكل
واتمنى نشوفكم على خير

lol!